Aaj Phir Ek Maa Bhukhi So Gai!

Syah kali raat me,
Bijli wale khambhe ki roshni tale,
Fati si maili chadar me lipti hui,
Wo dekh rahi thi shunya ki or.

Bhao rahit chehra, aansu rahit aanken,
Sikur ke baithi thi maano koi gathdi ho.

Samne rakhi hui katori me kuchh paise pade the,
aur thodi si juthi chawal faili hui thi,
Main gujar raha tha wahin paas se, Rukha,
Dekha log aa ja rahe the, koi paidal to koi motor car me,
par unko shayad roz hi ye nazara dikhne ko milta tha,
isliye sambedana mar gayi thi.

Maine apni jeb tatoli, socha kyon na kuchh paise hi de dun,
par achanak laga ke is maa ko aaj mamta ki zaroorat hai,
rakh liye paise jeb me wapas,
Puchha - "Amma, kya aap kuchh khaogi?"
Koi jawab na mila mujhe, maine phir ek dafe puchha,
Wo kuchh na boli.

Maine bhi aauron ki tarah hi use pith dikha di,
Aur ye sochta hua ghar chal diye ke ...
Aaj phir ek maa bhukhi so gai ....
Shayad mujhe bhi aadat par jayegi ... aansuon ko nazar andaz karne ki...